Pages

October 2, 2010

مين فيهم مينا ومين محمود؟

قصيدة جديدة تأليف صديقي إيهاب عبده. لعل البعض منا يتذكر اننا أبناء وطن واحد. ولعل الجميع يدرك جوهر الأديان هو عبادة الله وليس كراهية الأخر.

مين فيهم مينا ومين محمود؟

مين اللى مصلحته ينسيك كلمة وطن
مين اللى مصلحته يرميك ورا الزمن
مين اللى قاعد فوق مبسوط
ماسك الخيوط
مين مستفيد ..يفرّق يسود

افتح معايا ألبوم صور
منورة فى قلب الوطن
افتح معايا ألبوم صور
منورة فى قلب الوطن

فاكر تاريخك؟ يمكن نسيت
ثورة تساعتاشر يا بيه
وده أزهرى فاتح ببانه
شيخ ايده ماسكة فى ايد أخوانه
م القسيسين وبأعلى صوتهم معلنين
فى وش الجند المحتلين
لو طلبت خللينا احنا نموت
ويعيش أخواننا المسلمين

شايف الصفوف تقدر تقول
مين فيهم مينا ومين محمود؟

ودى لقطة مش محتاج أنا اقول
ده وفد سعد باشا زغلول
واللى اتنفوا بره البلد
سبع مصاروة بالعدد
واللى ضحوا بروحهم فداك
دقق شوية فى الأسماء

دقق شوية فى الوشوش
مين فيهم مينا ومين محمود؟

ودى صورة تانية لجندى مصرى
تاريخها عام تلاته وسبعين
لما حرّرنا سوا وطننا من الغادرين
وفى صدره كان حاطط انجيل ولا قرآن
كل اللى عارفه انه استشهد لجل الأوطان
ضحى بحياته عشان نعيش أحرار وكرام

شايف الجنود زى الأسود
مين فيهم مينا ومين محمود؟

وصوت جايللى
من قلب كنيسة  المصريين
بيقول عقبال القدس يا رب
ويا مقدّس مش حنقدّس
غير لما حسن يدخلها
فى ايده أخوه مرقس

ويا أزهرى رد ويا كنيستى
ايه مش سامعين
حق وطنكم جاى بينده
ليه مش رادين
ويا مُدرسى قوللى
ويا صحافة
ويا تلفزيون

مين اللى مصلحته ينسيك كلمة وطن
مين اللى مصلحته يرميك بره الزمن
مين اللى قاعد فوق مبسوط
ماسك الخيوط
مين مستفيد ..يفرّق يسود

Share/Bookmark

No comments: